EDITORIAL [Vol.XXIX - Issue No.26]

HNAMDANG HLAWH


Hnamdang hlawh Central YMA in a han bituk hi dan lam atanga han chhut vang vang chuan a dik tawk lohna lai sawi tur a awm awm e, Hetianga hnamdang hlawh bituk a nih chhan hi kawng hrang hrang a awm thei ang. Hnamdang, ram leilung fate nilovin an hlawh duh duh a an tisang thin hi Mizo hnam tan thilthalo tak mai a ni a, hetiang renga kan kal a nih chuan vai Mistiri te thu thu in kan la awm mai ang tih hi thil hlauhawm tak a ni. Chumai nilovin kan ram sum leh pai nasa takin min rawk tihna a ni a, hei hi Zofate hmalam hun atan thil thalo tak mai a ni bawk.
YMA member, thalai rualte kan harh a hun ta viau mai. Central YMA in hnamdang mistiri leh helper hlawh a buaipuia,khawpui chhung Branch OB te hial kokhawma hma ala ta hi ngun taka ngaihtuah chuan a zahthlakna chen pawh a awm awm e. Ngaihtuah chian chuan Mizo tlangval rual tan hian zahna tur thil tam tak a awm ngeiin a rinawm. Tlangval hnathawk peih lo, nu leh pa chaklo zawkte thawhchhuah sa ring a, eitur duhtui ringawt mai te, zan a rei tak tak meng a, zing tho duh lo YMA member, chhunlama khawimaw laia leng kual mai mai leh mi dawr vela khawsa mai mai thin te hian rilru thar pu a, kan insiamthat a hun ta. Hnamdang kan hmuhsit ho leh engahmah a kan ngaih loh te hi kan entawn a hun ta. Kristian kan inti a, Kohhran/Khawtlang a inhman hi chu a tha, kan sawisel lo. Mahse kan inhmanna hian kan nitin hnathawhna tibuai suh se. Zanrei tak tak thlenga pawl tan meng a, a tuk a hna kan thawh peih siloh chuan Kohhran leh pawl thiltum kan thelh chiang hle tih i hre thar ang u.
Mizoram hi Bengali, Mosolman, Buddhist te ram a ni lo va, Zofate ram atan Pathianin min pek a ni.I ram leh hnam tluchhe mek chhan tur hian engchenah nge tan ilo lak ve dawn le?