KHAWTLANG NUN SIAMTHAT - Rosangliana Sailo
KHAWTLANG NUN SIAMTHAT
(By Rosangliana Sailo, Gold Medalist, Br.YMA Sports 2011 Article writing Competition)
Eden bawhchhiatna ata tawh mihringten kan thlakhlelh em em khawvel a kan chen chhung hi chuan thawmthat leh siamthat ngai hi entikahmah kan kalsan dawn in a lang ta lo. Mahni ngei ngei pawh insiam tha thei tawh lo hringfate tan he kan lu nghahna kan khawtlang nun chhe mek siamthat hi kan tih mak mawh chu a lo ni ta reng mai. Chakna reng reng nei tawh lo a bawkvak a khawvel hmang mekte leh thangthar thaza rual te, lu a kelsam to chhap tawh, tairaw tiang hmang a thahrui chhete la nei ve tek tek kan pi leh pute nen he kan khawvel kan khawtlang hmangaih tak lei sulrul leh tuiekin a eichhiat mek siam tha tur hian mawhphurhna kan nei theuh a, hmangaihna a kan tuam hlawm leh keh thei dawma kan dawm kan fa tlum nausen te leh chhuan lo la awm zel tur te tana chhawmnun zel tlak khawtlang nun hlu leh zahawm din tur hian nang leh kei hi pen chhuak ang le.
Huaisen tak a do ngai chu do a, zirtir ngai chu thahnem ngai taka kan inzirtir hi a hun tak zet ta. Mifel kan chawimawi loh a, dik lohna kan palzam mai mai hian sual nasa takin kan tipung a, dikna leh felna a inkiltawih a, sualna a rawn huangtau thin. Dikna leh rinawmna duha kan awm dual dual a, siamthat ngai siam tha tura ke kan pen ngam leh si loh chuan kan chan chuan maian chan pawh a tluk dawn lo tih hi chu mi a nileng lo tan chuan hriat a hun ta! Mahni tapchhak zawl atang ringawt chuan he khawtlang a siamthat ngai hi siam that theih in beisei suh, thawkchhuak rawh.
I rui zel dawn maw : Ruihhlo hi kan ram leh kan khawtlang hi dim baksal lovin a rawn pawngsual ta hmiah hmiah mai si a, he ruihhlo chimawm tak hian hmangaihna a keng tel hauh bawk si lo. He a zunzam leh thil tih theihna awmkhauh pui mai hian i kum upat leh naupan a sawi lova, i hausak leh retheih a thliar hek lo. I hrisel leh hrisel loh pawh ngaihtuah chuang lovin rawng takin a rawn thuai ta che a, a bawi rapthak tak chhung a hnuh luh che tumin a theihna mual mual ah a phi ruai ta mai si a. He ruihhlo hian i chak lohna lai a hai lo a, khawi lai hmun fianfial lai ah a khurbin pui che a, tal chhuak leh thei tawh ngai lo tura i hnungkhirh hi a tum ber chu a ni asin. Chu chuan chhungkuaah buaina namen lo tak a hringchhuak a, chumi rual chuan khawtlangin buaina a tawk ve ta nghal thin a ni. Hmangaihna tawp ve ngai lo a hmangaihtu i nu leh i pa, i unaute leh i biak lai Pathian ngei pawh hian chauan hremhmun kawng i zawh an phal thei lo asin. He khawtlang hian i thiamna te, i chakna te hi a mamawh a, i tel lo chuan a ding chang thei dawn ta lo. Mihring nun hlu tak lainatna tel hauh lo a suattu ruihhlo hian chin tawk neih lah a tum si lo. Huangtau tak a kan ram leh kan khawtlang a lo len mek lai hian i thiamna leh i finna te, i chakna leh i huaisenna hmang khan tudai rawn le. He khawtlang hian i tan thil tih theihna nei turin chakna a nei tawh lova, he khawtlang tan a i thiltih theih chu tak tak a ni thung si.
Engtin...? : He khawtlang a ruihhloin kan thalai rual mai pawh duhtawk zo tawh lova, nupui fanau hrawkchawm lai ngei ngeite pawh zuah lova, manganna thlan khur thim a hnuh luh a tum mek lai hi i hmuh hmaih bik lo ang. He sual chimawm tak nuai bo tur hian i tling tawk a, i chak a, i huaisen tawk e. Enteh.. thalai duhawm tak tak kan khawtlang thlamuanpui tu turte, kan ram hruaitu la nimai tur leh khawtlang tihmingthatu tur a kan nghahhlelh em em ruihhlo in a bawih a hnuh luh a tum mek lai te, chhungkaw khaipa ber nupui fanau te’n nghakhlel tak a lo thlir lai a, ruihhlo thlang zawk a, a uire san ta mai te, tleirual tituai nalh tak leh duhawm tak dawidim in a dawi at tak avanga chhia leh tha hriatna pawh hmang mumal thei lova, a duh leh hman apiang in a pawh phar tak lawp lawp lai te aw...i thuthmun atanga thlir ringawt lo khan an mahni chhanhhuak turin tho la, ding ta che!! Man khawma vuak hrep hian an thinlung kan hnen lo mai a ni lova, kan ti luhlul zawk thei. He khawtlang hian a hmangaih che a, i hmangaih let ve dawn lawm ni? Ruihhlo bawih a tang mek te’n kawtlang buaina an siam thinte hi dem ngawt suh. Sual sual zia hre chungin hmangaihna nen kawm la, an lu chunga kut nghata i tawngtai ka phut lo, i nitin tawngtaina ah an tan rilru leh tih tak zet in engkimtithei leh misualte hmangaihtu kan Pathian hnenah dilpui rawh. An nun a khawhar a, ruihhlo bawih ata talchhuak leh turin chakna an nei tawh lova, hmangaiha kuangkuah tu an ngai a, nang leh kei hi an mamawh chhanna tur chu kan ni. An tan Pathian khawngaihna leh a chhanchhuahna lanchhuah na hun leh hmun remchang buatsaih sak thei phei ila chuan he khawtlang nun hi a va hlim lehzual dawn em!!!
A hawih mah mah em ni? : Pasaltha hmingthang Vanapa te, Taitesena te leh Khuangchera te hun a liam tawh ta, khawthlang leh khawchhak nun mak pui pui in kan ram leh kan khawtlang, kan chhungkua a rawn run mup mup a, a tha lam entawn duh mang si lovin an nun thiangzau tak mai chu mahni remchan ang ang in kan duhna lai lai ah kan lo rekbung ve ta hmiah hmiah mai a, he nun mak pui mai hian kan Mizo ze fir chu a rawn pawlh dal tial tial a, chu chuan nang ngei pawh zuah bik tawh chuang lovin i awmdan leh i nunphungte chu Lady Gaga te leh Miley Cyrus te nunphung nen a rawn herhmil tan a, i hringtu i nu leh i pa te ngei pawh, he nunthar hian a rawn tuam tawh che avangin i tan chuan an lo thing zo ta !! i nu in pawnfen fual a feng a, i pa in kekawr parallel a hakte chu i tan chuan a va thing tak em! I taksa pianzia a ngial a ngan a lan theihnan Slacks leh Blue Queen i thlang a, i mal kha nangma hmuh chauh duhtawk lovin khawtlang mipui hmaah rawn phochhuak in kekawrbul tih tham mang loh khawpa bul i rawn hachhuak a, a lo hmutute mit i ti tlai a, nalh an ti ngawih ngawih che a, i beisei leh i duhthusam chu i hmu ta a, chutih rual chuan mi thenkhatin i lakah beiseina rapthlak tak an lo nei ve nghal a. I inchei dan atang khan miin i chhungril nun leh mizia an zir nghal a, i ngaihzawng ngei pawh khan i lakah thil beisei ruk tih hlawhtlin ngei ngei tum tlang deuh a lo neih phah ta thin a ni. I inchei dan kha nalh in changkang hle mahse, i nu leh i pa thawhchhuah atang ringawt a i lei a nih chhung chuan rawlthar ho in an ngaisang lo ang che. Hetianga Western leh Eastern culture mak pui pui kan lo practice ve hian khawtlangah nun dahlau a rawn pawchhuak a, mahni culture ngaihnepna mai bakah pawlawh taka mipat hmeichhiatna hman duhna te a rawn hringchhuak ta thin a. Hei hian kan ram, kan khawtlang leh kan chhungkua ah a tha lo zawngin thui takin nghawng a nei tih hria ang che. Zing chaw eikhamah mite chu hnathawk turin an liam sung sung a, engmah thawk ve lo tura mi inah te, mi dawrah te nilenga thut kha nuam i ti maw? Thil zahthlak a ni mai lova, thil pawi tak a ni tih ka hrilh ang che. Awm awl hi sualbul tanna remchang tak a ni a, bansan la, i thawhchhuah ngeiin kuhva leh cigarette lei ve tawh rawh. I awm awl lutuk hian miin an ngaisang lo che a ni satliah lova, an hmusit che tih hi an hrilh duh si lo che a, ka’n hrilh ta mai che a nih hi. Nang hi kan khawtlang hmai ti baltu pakhat i ni a, inngaihtuah harh la, nunthar in nung tawh rawh le.
Nu leh pa te u....in fate nungchang, an mizia leh an duhzawng hriatpui rawh u. I inchei ngam loh dan (Style) lepchiah deuhin i fanu kha chei suh, inchhirin ban a chen anga, zawh loh nghawngkawl i bat dah ang e. Incheina kawngah i fanu, i fapa i enkawl dan atang hian khawtlang nun hi i siam tha in , i tichhe thei tih hria la fimkhur rawh. I fate aiin Mary kay leh seconhand tih vel i buaipui thin em? Chawlhni ah inkhawm dar alo ri a, mi in Biak In lam an pan sung sung laiin, chhuanlam fahrah te te siam a Biak In bak zawng a hun i hman fo chuan i fate hu inkhawm ngai pawimawh viau turin beisei lo la, an entawn tur in a takin nung rawh. Sapzu changkang tak tak in theih reng hi changkanna a ni lova, i fate hmuh lai phei chuan in suh, i thei thur ei ah i fapa ha kha alo tim hlauh a nge. He khawtlang hi midang rawn enkawl tur a nilova, hma alo sawn zel theihna tur leh a chhe lai siamtha turin i inchhung atang khan bul tan rawh le.
Mizo kan ni miau a : thihna hi mikhual, kan duh emaw duh lo emaw tu inah pawh thleng thei thut thei a ni a, mi chan turah dah ngawt suh. He thu i chhiarlai mek pawh hian i inah a rawn leng thei tih hria la, he khual duhawm lo tak thleng mektu chhungkua te chu i theih ang tawk in tanpui rawh. An tan i hunhlu tak seng la, i inchhir ngai lovang. Mipa i nih chuan thlanlai turin emaw mitthi in lamah emaw tihtur tul ang ang ti turin tho la, kal rawh. Mizo i ni a, i mawhphurhna a ni. Hmeichhe awmnem zawk i nih vang ringawt a mahni inluma TV lo en mai mai bik tur pawh i ni hek lova, Mizo i nih avanga lusun chhungte tan i tih theih ang ang ti ve tur i ni. Mizo i ni miau a. Mitthi luman ngai an awmin nuam tawlna zanah nang chuan hmang ve lul suh ang che. Hmun fianrial khawi emaw laiah o inbengberek a, thiante mitthi inlama an zai thap thap laia lo heheu ta vel mai mai thin te hi mi anglo an ni a, khawngaih la tawngtaisak fo rawh. Chhiatni thatni a mi tan i hun hlu tak seng a i thawhchhuah hian a nachang hreve lo te i kaiharh a. a taka entawntlaka khawtlang tan i thiamna leh i theihna te i hman hian Zonun zemawi i chhawm nung a ni satliah lova, khawtlang nun i siamtha a ni.
Khawtlang nun siamthatna kawng a pawimawh em em pakhat chu Aia Upa zah hi a ni. I aia naupangin a zah che i phut chuan nangman i aia upa te i zahthiam a ngai. I aiaupa chu engmah nilo, nang aia mawl leh lehkha pawh nang aia zir sang ve lo pawh a ni thei, mahse i aia Upa a nih miau avangin i zah tur a ni.Hei hi kan mizo pi pu te thil rohlu a lo ni reng asin. Tin, kan khawtlang hruaitu ten thil ti tura min ti a nih chuan phun lova tih mai hi mifing nihna a ni a,a ngiaunger pawlah tang suh ang che. Hnatlang an koh chuan hnatlang mai la, mitthi tlaivar ngai an awm chuan tlaivar mai tur. A sawisel leh phunnawi zawnga khawsak chin hi mipangngai lo tihdan a ni a, i he lova thuawih tak a ti mai thin mite hian khawtlang hruaitu te chauh an chawimawi lova, khawtlang inrelbawl dan an tizahawm a ni.
A tawpberah chuan Nu leh Pa te u, in fate in hrechiang em? Inchhungah mipa naupang feltak anga lang a, pawnlamah buaina siam hrat mi a ni em? Inchhungah hmeichhe naupang duhawm tak anga a lan lai khan pawnlam ah chuan nula pangngai khawsak anga khawsa in tlangval a lo ngam viau em le? Khawtlanga mi inpe leh tlawmngai ten i fapa in midang tan harsatna emaw a siam avanga an zilhhau in ilo tan nghal ngawt thin em? Hetiang mi Nu leh Pa thenkhatte hian khawtlang siamthatna kawngah tlawmngai pawlte hmalakna an tichak lo thin a ni, khawtlanga mi tlawmngai, hlawh leh hamthatna engmah neilo a vengchhung vil rengtute meuhin an zilhhau tawh i fa chu tanin khawngaih nghal ngawt suh, zilhhau ngai leh tawh lo turin zirtir zawk ang che. I fanu chu hrechiang la, a thian kawm leh a thil lawm zawngte hrechiang la, hmun him lova a kal loh nan en ngun rawh. Kohhran leh khawtlangah mi tangkai ni turin zirtirin fuih ang che. Tichuan khawtlang nun siamthatna chu nasa takin i tapchhak zawl atangin i thawk nghal dawn zu nia.
(By Rosangliana Sailo, Gold Medalist, Br.YMA Sports 2011 Article writing Competition)
Eden bawhchhiatna ata tawh mihringten kan thlakhlelh em em khawvel a kan chen chhung hi chuan thawmthat leh siamthat ngai hi entikahmah kan kalsan dawn in a lang ta lo. Mahni ngei ngei pawh insiam tha thei tawh lo hringfate tan he kan lu nghahna kan khawtlang nun chhe mek siamthat hi kan tih mak mawh chu a lo ni ta reng mai. Chakna reng reng nei tawh lo a bawkvak a khawvel hmang mekte leh thangthar thaza rual te, lu a kelsam to chhap tawh, tairaw tiang hmang a thahrui chhete la nei ve tek tek kan pi leh pute nen he kan khawvel kan khawtlang hmangaih tak lei sulrul leh tuiekin a eichhiat mek siam tha tur hian mawhphurhna kan nei theuh a, hmangaihna a kan tuam hlawm leh keh thei dawma kan dawm kan fa tlum nausen te leh chhuan lo la awm zel tur te tana chhawmnun zel tlak khawtlang nun hlu leh zahawm din tur hian nang leh kei hi pen chhuak ang le.
Huaisen tak a do ngai chu do a, zirtir ngai chu thahnem ngai taka kan inzirtir hi a hun tak zet ta. Mifel kan chawimawi loh a, dik lohna kan palzam mai mai hian sual nasa takin kan tipung a, dikna leh felna a inkiltawih a, sualna a rawn huangtau thin. Dikna leh rinawmna duha kan awm dual dual a, siamthat ngai siam tha tura ke kan pen ngam leh si loh chuan kan chan chuan maian chan pawh a tluk dawn lo tih hi chu mi a nileng lo tan chuan hriat a hun ta! Mahni tapchhak zawl atang ringawt chuan he khawtlang a siamthat ngai hi siam that theih in beisei suh, thawkchhuak rawh.
I rui zel dawn maw : Ruihhlo hi kan ram leh kan khawtlang hi dim baksal lovin a rawn pawngsual ta hmiah hmiah mai si a, he ruihhlo chimawm tak hian hmangaihna a keng tel hauh bawk si lo. He a zunzam leh thil tih theihna awmkhauh pui mai hian i kum upat leh naupan a sawi lova, i hausak leh retheih a thliar hek lo. I hrisel leh hrisel loh pawh ngaihtuah chuang lovin rawng takin a rawn thuai ta che a, a bawi rapthak tak chhung a hnuh luh che tumin a theihna mual mual ah a phi ruai ta mai si a. He ruihhlo hian i chak lohna lai a hai lo a, khawi lai hmun fianfial lai ah a khurbin pui che a, tal chhuak leh thei tawh ngai lo tura i hnungkhirh hi a tum ber chu a ni asin. Chu chuan chhungkuaah buaina namen lo tak a hringchhuak a, chumi rual chuan khawtlangin buaina a tawk ve ta nghal thin a ni. Hmangaihna tawp ve ngai lo a hmangaihtu i nu leh i pa, i unaute leh i biak lai Pathian ngei pawh hian chauan hremhmun kawng i zawh an phal thei lo asin. He khawtlang hian i thiamna te, i chakna te hi a mamawh a, i tel lo chuan a ding chang thei dawn ta lo. Mihring nun hlu tak lainatna tel hauh lo a suattu ruihhlo hian chin tawk neih lah a tum si lo. Huangtau tak a kan ram leh kan khawtlang a lo len mek lai hian i thiamna leh i finna te, i chakna leh i huaisenna hmang khan tudai rawn le. He khawtlang hian i tan thil tih theihna nei turin chakna a nei tawh lova, he khawtlang tan a i thiltih theih chu tak tak a ni thung si.
Engtin...? : He khawtlang a ruihhloin kan thalai rual mai pawh duhtawk zo tawh lova, nupui fanau hrawkchawm lai ngei ngeite pawh zuah lova, manganna thlan khur thim a hnuh luh a tum mek lai hi i hmuh hmaih bik lo ang. He sual chimawm tak nuai bo tur hian i tling tawk a, i chak a, i huaisen tawk e. Enteh.. thalai duhawm tak tak kan khawtlang thlamuanpui tu turte, kan ram hruaitu la nimai tur leh khawtlang tihmingthatu tur a kan nghahhlelh em em ruihhlo in a bawih a hnuh luh a tum mek lai te, chhungkaw khaipa ber nupui fanau te’n nghakhlel tak a lo thlir lai a, ruihhlo thlang zawk a, a uire san ta mai te, tleirual tituai nalh tak leh duhawm tak dawidim in a dawi at tak avanga chhia leh tha hriatna pawh hmang mumal thei lova, a duh leh hman apiang in a pawh phar tak lawp lawp lai te aw...i thuthmun atanga thlir ringawt lo khan an mahni chhanhhuak turin tho la, ding ta che!! Man khawma vuak hrep hian an thinlung kan hnen lo mai a ni lova, kan ti luhlul zawk thei. He khawtlang hian a hmangaih che a, i hmangaih let ve dawn lawm ni? Ruihhlo bawih a tang mek te’n kawtlang buaina an siam thinte hi dem ngawt suh. Sual sual zia hre chungin hmangaihna nen kawm la, an lu chunga kut nghata i tawngtai ka phut lo, i nitin tawngtaina ah an tan rilru leh tih tak zet in engkimtithei leh misualte hmangaihtu kan Pathian hnenah dilpui rawh. An nun a khawhar a, ruihhlo bawih ata talchhuak leh turin chakna an nei tawh lova, hmangaiha kuangkuah tu an ngai a, nang leh kei hi an mamawh chhanna tur chu kan ni. An tan Pathian khawngaihna leh a chhanchhuahna lanchhuah na hun leh hmun remchang buatsaih sak thei phei ila chuan he khawtlang nun hi a va hlim lehzual dawn em!!!
A hawih mah mah em ni? : Pasaltha hmingthang Vanapa te, Taitesena te leh Khuangchera te hun a liam tawh ta, khawthlang leh khawchhak nun mak pui pui in kan ram leh kan khawtlang, kan chhungkua a rawn run mup mup a, a tha lam entawn duh mang si lovin an nun thiangzau tak mai chu mahni remchan ang ang in kan duhna lai lai ah kan lo rekbung ve ta hmiah hmiah mai a, he nun mak pui mai hian kan Mizo ze fir chu a rawn pawlh dal tial tial a, chu chuan nang ngei pawh zuah bik tawh chuang lovin i awmdan leh i nunphungte chu Lady Gaga te leh Miley Cyrus te nunphung nen a rawn herhmil tan a, i hringtu i nu leh i pa te ngei pawh, he nunthar hian a rawn tuam tawh che avangin i tan chuan an lo thing zo ta !! i nu in pawnfen fual a feng a, i pa in kekawr parallel a hakte chu i tan chuan a va thing tak em! I taksa pianzia a ngial a ngan a lan theihnan Slacks leh Blue Queen i thlang a, i mal kha nangma hmuh chauh duhtawk lovin khawtlang mipui hmaah rawn phochhuak in kekawrbul tih tham mang loh khawpa bul i rawn hachhuak a, a lo hmutute mit i ti tlai a, nalh an ti ngawih ngawih che a, i beisei leh i duhthusam chu i hmu ta a, chutih rual chuan mi thenkhatin i lakah beiseina rapthlak tak an lo nei ve nghal a. I inchei dan atang khan miin i chhungril nun leh mizia an zir nghal a, i ngaihzawng ngei pawh khan i lakah thil beisei ruk tih hlawhtlin ngei ngei tum tlang deuh a lo neih phah ta thin a ni. I inchei dan kha nalh in changkang hle mahse, i nu leh i pa thawhchhuah atang ringawt a i lei a nih chhung chuan rawlthar ho in an ngaisang lo ang che. Hetianga Western leh Eastern culture mak pui pui kan lo practice ve hian khawtlangah nun dahlau a rawn pawchhuak a, mahni culture ngaihnepna mai bakah pawlawh taka mipat hmeichhiatna hman duhna te a rawn hringchhuak ta thin a. Hei hian kan ram, kan khawtlang leh kan chhungkua ah a tha lo zawngin thui takin nghawng a nei tih hria ang che. Zing chaw eikhamah mite chu hnathawk turin an liam sung sung a, engmah thawk ve lo tura mi inah te, mi dawrah te nilenga thut kha nuam i ti maw? Thil zahthlak a ni mai lova, thil pawi tak a ni tih ka hrilh ang che. Awm awl hi sualbul tanna remchang tak a ni a, bansan la, i thawhchhuah ngeiin kuhva leh cigarette lei ve tawh rawh. I awm awl lutuk hian miin an ngaisang lo che a ni satliah lova, an hmusit che tih hi an hrilh duh si lo che a, ka’n hrilh ta mai che a nih hi. Nang hi kan khawtlang hmai ti baltu pakhat i ni a, inngaihtuah harh la, nunthar in nung tawh rawh le.
Nu leh pa te u....in fate nungchang, an mizia leh an duhzawng hriatpui rawh u. I inchei ngam loh dan (Style) lepchiah deuhin i fanu kha chei suh, inchhirin ban a chen anga, zawh loh nghawngkawl i bat dah ang e. Incheina kawngah i fanu, i fapa i enkawl dan atang hian khawtlang nun hi i siam tha in , i tichhe thei tih hria la fimkhur rawh. I fate aiin Mary kay leh seconhand tih vel i buaipui thin em? Chawlhni ah inkhawm dar alo ri a, mi in Biak In lam an pan sung sung laiin, chhuanlam fahrah te te siam a Biak In bak zawng a hun i hman fo chuan i fate hu inkhawm ngai pawimawh viau turin beisei lo la, an entawn tur in a takin nung rawh. Sapzu changkang tak tak in theih reng hi changkanna a ni lova, i fate hmuh lai phei chuan in suh, i thei thur ei ah i fapa ha kha alo tim hlauh a nge. He khawtlang hi midang rawn enkawl tur a nilova, hma alo sawn zel theihna tur leh a chhe lai siamtha turin i inchhung atang khan bul tan rawh le.
Mizo kan ni miau a : thihna hi mikhual, kan duh emaw duh lo emaw tu inah pawh thleng thei thut thei a ni a, mi chan turah dah ngawt suh. He thu i chhiarlai mek pawh hian i inah a rawn leng thei tih hria la, he khual duhawm lo tak thleng mektu chhungkua te chu i theih ang tawk in tanpui rawh. An tan i hunhlu tak seng la, i inchhir ngai lovang. Mipa i nih chuan thlanlai turin emaw mitthi in lamah emaw tihtur tul ang ang ti turin tho la, kal rawh. Mizo i ni a, i mawhphurhna a ni. Hmeichhe awmnem zawk i nih vang ringawt a mahni inluma TV lo en mai mai bik tur pawh i ni hek lova, Mizo i nih avanga lusun chhungte tan i tih theih ang ang ti ve tur i ni. Mizo i ni miau a. Mitthi luman ngai an awmin nuam tawlna zanah nang chuan hmang ve lul suh ang che. Hmun fianrial khawi emaw laiah o inbengberek a, thiante mitthi inlama an zai thap thap laia lo heheu ta vel mai mai thin te hi mi anglo an ni a, khawngaih la tawngtaisak fo rawh. Chhiatni thatni a mi tan i hun hlu tak seng a i thawhchhuah hian a nachang hreve lo te i kaiharh a. a taka entawntlaka khawtlang tan i thiamna leh i theihna te i hman hian Zonun zemawi i chhawm nung a ni satliah lova, khawtlang nun i siamtha a ni.
Khawtlang nun siamthatna kawng a pawimawh em em pakhat chu Aia Upa zah hi a ni. I aia naupangin a zah che i phut chuan nangman i aia upa te i zahthiam a ngai. I aiaupa chu engmah nilo, nang aia mawl leh lehkha pawh nang aia zir sang ve lo pawh a ni thei, mahse i aia Upa a nih miau avangin i zah tur a ni.Hei hi kan mizo pi pu te thil rohlu a lo ni reng asin. Tin, kan khawtlang hruaitu ten thil ti tura min ti a nih chuan phun lova tih mai hi mifing nihna a ni a,a ngiaunger pawlah tang suh ang che. Hnatlang an koh chuan hnatlang mai la, mitthi tlaivar ngai an awm chuan tlaivar mai tur. A sawisel leh phunnawi zawnga khawsak chin hi mipangngai lo tihdan a ni a, i he lova thuawih tak a ti mai thin mite hian khawtlang hruaitu te chauh an chawimawi lova, khawtlang inrelbawl dan an tizahawm a ni.
A tawpberah chuan Nu leh Pa te u, in fate in hrechiang em? Inchhungah mipa naupang feltak anga lang a, pawnlamah buaina siam hrat mi a ni em? Inchhungah hmeichhe naupang duhawm tak anga a lan lai khan pawnlam ah chuan nula pangngai khawsak anga khawsa in tlangval a lo ngam viau em le? Khawtlanga mi inpe leh tlawmngai ten i fapa in midang tan harsatna emaw a siam avanga an zilhhau in ilo tan nghal ngawt thin em? Hetiang mi Nu leh Pa thenkhatte hian khawtlang siamthatna kawngah tlawmngai pawlte hmalakna an tichak lo thin a ni, khawtlanga mi tlawmngai, hlawh leh hamthatna engmah neilo a vengchhung vil rengtute meuhin an zilhhau tawh i fa chu tanin khawngaih nghal ngawt suh, zilhhau ngai leh tawh lo turin zirtir zawk ang che. I fanu chu hrechiang la, a thian kawm leh a thil lawm zawngte hrechiang la, hmun him lova a kal loh nan en ngun rawh. Kohhran leh khawtlangah mi tangkai ni turin zirtirin fuih ang che. Tichuan khawtlang nun siamthatna chu nasa takin i tapchhak zawl atangin i thawk nghal dawn zu nia.
No comments: